Zvarritja Kuvend-Kushtetuese si strategji për të bllokuar SPAK-un

Grupi Parlamentar i Partisë Demokratike ka reaguar sot për çështjen e pezullimit të Belinda Ballukut, duke denoncuar vonesat e qëllimshme si një operacion të koordinuar politik për të penguar hetimet e SPAK.

Sipas opozitës, mazhoranca socialiste dhe Edi Rama po përdorin zvarritjen si mekanizëm mbrojtës për Ballukun. Të njëjtën strategji, theksojnë ata, po ndjek edhe Gjykata Kushtetuese, e cila dje shtyu pa afat vendimmarrjen për të pandehurën.

Sot, Kuvendi i Shqipërisë ka ndjekur po të njëjtën linjë: mbledhja e Këshillit të Mandateve është shtyrë pa arsyetim të ligjshëm, me justifikimin se duhet pritur vendimi i Kushtetueses, edhe pse masa e re e sigurisë që kërkon SPAK nuk ka lidhje me pezullimin nga detyra.

“Si shtyrja e Gjykatës Kushtetuese, ashtu edhe ajo e Kuvendit, janë hallka të të njëjtit zinxhir mbrojtës, të komanduar politikisht nga Edi Rama,” thuhet në reagimin e PD-së.

Opozita nënvizon se Gjykata Kushtetuese ka detyrimin ligjor të shqyrtojë me përparësi këtë çështje dhe të marrë vendimmarrje që të zhbllokojë veprimtarinë hetimore të SPAK. Çdo vonesë, sipas PD-së, shërben për Ramën për të “blerë kohë kundër drejtësisë” dhe për Ballukun për të prishur prova, intimiduar dëshmitarë dhe për të vijuar aferat korruptive me vlerë miliona euro.

REAGIMI I GRUPIT PARLAMENTAR TË PD:

Zvarritja e çështjes Balluku, si në Parlament ashtu edhe në Gjykatën Kushtetuese, nuk është rastësi, por një operacion i koordinuar politik për të bllokuar SPAK-un dhe për të mbrojtur korrupsionin në majë të pushtetit.

Mazhoranca socialiste dhe Edi Rama kanë zgjedhur zvarritjen si mekanizëm mbrojtës për Belinda Ballukun. Të njëjtën strategji ka ndjekur edhe Gjykata Kushtetuese, e cila dje shtyu pa afat vendimmarrjen për të pandehurën Belinda Balluku.

Sot, Kuvendi i Shqipërisë ka vijuar të njëjtën linjë: është shtyrë, pa asnjë arsye të ligjshme, mbledhja e Këshillit të Mandateve, me justifikimin se duhet pritur vendimi i Gjykatës Kushtetuese, edhe pse masa e re e sigurisë që kërkon SPAK ndaj Ballukut nuk ka asnjë lidhje me çështjen e pezullimit nga detyra.

Si shtyrja nga Gjykata Kushtetuese, ashtu edhe shtyrja nga Kuvendi janë hallka të të njëjtit zinxhir mbrojtës, i komanduar politikisht nga Edi Rama.

Për shkak se ka marrë një vendim pezullimi të vendimit të GJKKO-së, Gjykata Kushtetuese ka detyrimin ligjor të shqyrtojë këtë çështje me përparësi dhe të konkludojë me një vendimmarrje që zhbllokon veprimtarinë hetimore të SPAK.

Çdo vonesë është shërbim i drejtpërdrejtë për Edi Ramën, për të blerë kohë kundër drejtësisë, dhe për të pandehurën Balluku, për prishje provash, intimidim dëshmitarësh dhe vijim të aferave korruptive me vlerë miliona euro.