15-vjeçarja hidhet nga lartësia, transportohet me urgjencë në spital

Një ngjarje e rëndë është regjistruar në Vorë, ku një 15-vjeçare dyshohet se është vetëhedhur nga një lartësi pranë banesës së saj, pas një situate të vazhdueshme të tensionuar në familje.

Sipas informacioneve paraprake, prindërit e saj po hetohen në gjendje të lirë, pasi dyshohet se kanë ushtruar dhunë psikologjike ndaj të miturës. E reja është transportuar menjëherë në spital, ku ndodhet jashtë rrezikut për jetën, por në gjendje të rënduar emocionale.

Burime bëjnë me dije se kryefamiljari kishte dalë së fundmi nga burgu, ku kishte qenë i dënuar për dhunë në familje, çka ngre dyshime të forta mbi klimën e tensionuar në banesë.

Për shkak të gjendjes psikologjike, vajza nuk ka mundur ende të japë një dëshmi të plotë para hetuesve. Ndërkohë, nga deklarimet e të afërmve dyshohet se konflikte të shpeshta dhe mosmarrëveshje të vazhdueshme në familje mund të kenë çuar në këtë akt të rëndë.

Policia dhe organet hetimore po vijojnë punën për të zbardhur plotësisht rrethanat e ngjarjes dhe për të përcaktuar përgjegjësitë ligjore.