17 familje janë evakuuar në Noveselë. Dritan Leli apel qytetarëve: Ata që janë në zonat e rrezikut të largohen

Novosela mbetet pika më e nxehtë e përmbytjeve që kanë ndodhur në zonën e Vlorës si pasojë e daljes nga shtrati të lumit Vjosa. Deri më tani raportohet për 17 familje të cilat janë evakuuar nga banesat e tyre, ndërkohë që procesi i evakuimeve vijon ende. 

Situata duket shqetësuese ku banorët raportojnë se niveli i lumit Vjosë ka prekur kuota që ata nuk i kanë vërejtur ndonjëherë.

Kryetari i Bashkisë së Vlorës, Dritan Leli, nga terreni u bëri thirrje banorëve të Novoselës që ndodhen në zonat e rrezikut të evakuohen përpara se të jetë vonë, pasi uji ka të papritura dhe nuk mund të parashikohet e ardhmja. Leli u shpreh optimist për normalizimin e situatës, pasi sipas tij të dhënat tregojnë se ka rënie të nivelit të Vjosës në zonën e Memaliajt dhe Përmetit.

“Gjithmonë zgjidhja jepet që në momentin e parë dhe zgjidhja është dhënë që paraditen e djeshme. Bashkë me drejtuesin e Njësisë Administrative, me Policinë Bashkiake dhe Emergjencat Civile ne shkuam shtëpi më shtëpi dhe kemi njoftuar të gjithë banorët e Novoselës të cilët kanë banesat më në rrezik, të cilët nuk kanë pranuar të zgjedhin vendet e akomodimit nga bashkia por janë strehuar te të afërmit e tyre.

Ne jemi këtu të gjithë, gjithë drejtorët e bashkisë Vlorë, gjithë administratorët janë këtu pasi është pika më e nxehtë e të gjithë situatës të këtyre ditëve, Kanani është në krye të detyrës për të bërë maksimumin, mjetet e bashkisë Vlorë, eskavatorët dhe maunet që sjellin inerte janë këtu për të bërë këtë bllokim të argjinaturës, e cila është investuar së fundmi dhe të bëjmë maksimumin për të minimizuar dëmet.

Siç e shikoni është një nga ato situata ku dhe siç thonë vendasit nuk ka bërë vaki që uji të dalë mbi urën e vjetër. Është një situatë që do angazhim dhe do sensibilitet qytetar, unë bëj thirrjen time që për gjithë qytetarët që janë në zona që ka rrezik të largohen sa më shpejt pas uji ka të papritura, ne nuk mund të bëjmë parashikime megjithëse lajmet janë shpresdhënëse pasi ka një ulje të nivelit të Vjosës në zonën e Përmetit”, tha Leli.