22-vjetori i rënies së Adem Jasharit dhe luftëtarëve të tij

Sot shënohet 5 marsi i vitit 1998, kur ra në luftë me forcat serbe komandanti legjendar, Adem Jashari, familja e tij dhe Jasharë të tjerë.

Që nga viti 1991 deri më 1998, Prekazi dhe Drenica ishin të rrethuar nga forcat paramilitare serbe. Synimi ishte vrasja e komandantit të Ushtrisë Çlirimtare të Kosovës, Adem Jashari dhe familjes së tij, për të shuar dhe shtypur rezistencën që familja Jashari me në krye Ademin e Hamzën i bënin regjimit të Sllobodan Millosheviçit.

Më 30 dhjetor të vitit 1991 ndodhi sulmi i parë ndaj familjes Jashari. Ndërsa sulmin e dytë forcat paramilitare serbe e kryen në muajin janar, 1998.

Më 22 janar serbët sulmuan familjen Jashari, por edhe kësaj beteje, fëmijët dhe gratë e familjes Jashari i rezistuan.

Megjithatë, në këtë përplasje që zgjati afërisht 30 minuta, mbetën të plagosura Iliriana, vajza e Rifat Jasharit dhe Selvetja, vajza e Hamzë Jasharit.

Sulmi i tretë, që ndodhi më 5, 6 dhe 7 mars të vitit 1998, iu mori jetën 55 njerëzve në fshatin Prekaz, 22 prej të cilëve ishin familjarë të ngushtë të Adem Jasharit.

Këtij sulmi i mbijetoi vetëm Bashkimi, djali i Rifatit, i cili ia doli të largohej dhe t’i shpëtonte sulmit, si dhe Besarta, vajza e Hamzës, e cila përjetoi tmerrin ndërsa i vriteshin anëtarët e familjes së saj.

Në 22-vjetorin e rënies heroike të komandantit legjendar Adem Jashari, familjes Jashari, dëshmorëve të kombit si dhe të gjithë të rënëve për liri, Qeveria e Kosovës organizon çdo 5, 6 dhe 7 mars, manifestimin gjithëpopullor “Epopeja e Ushtrisë Çlirimtare të Kosovës”.

Gjithashtu edhe Kuvendi i Kosovës do të mbajë sot një seancë solemne me rastin e 22-vjetorit të Epopesë së UÇK-së, me të vetmen pikë të rendit të ditës për shënimin e këtij përvjetori.

Në Prekaz, në Lagjen e Jasharëve është ngritur monumenti më i madh i luftës për liri, për pavarësi dhe demokraci. Historia e familjes Jashari dhe luftëtarëve të saj janë vendosur në Muzeun e Epopesë së Ushtrisë Çlirimtare të Kosovës.