300 mijë dollarë për lirinë e Veliajt që akuzohet për korrupsion

Teksa Erion Veliaj ndodhet pas hekurave, i akuzuar nga SPAK për afera të rënda korruptive që tronditën themelet e Bashkisë së Tiranës, liria e tij ka marrë tashmë një çmim konkret: 300 mijë dollarë të paguara paraprakisht për një super-studio ligjore amerikane. Dhe kjo është vetëm fatura e parë.

Avokatët e Kasowitz Benson Torres LLP, një nga firmat më të njohura në SHBA, janë angazhuar të shpëtojnë Veliajn nga pasojat e dosjes së tij në Shqipëri, por tarifa e tyre e justifikon me të vërtetë emrin “elitë”:

•Daniel J. Fetterman: 1,950 dollarë në orë

•Brian S. Choi: 1,275 dollarë në orë

•Richard Pinal: 500 dollarë në orë

Vetëm një ditë pune e plotë nga kjo treshe avokatësh i kushton Veliajt mbi 40 mijë dollarë. Në një vend ku qytetarët mbijetojnë me paga mujore që mezi kalojnë 800 dollarë, pyetja është e thjeshtë: Nga dalin këto para?

Sipas dokumenteve, pagesa është bërë nga vëllai i tij, Arbër Veliaj, por opinioni publik e ka të vështirë ta përtypë këtë ‘dashuri’ vëllazërore në shifra kaq të frikshme. Kjo histori nuk është më thjesht një betejë ligjore – është një pasqyrë brutale e ndarjes së thellë që ekziston në Shqipëri mes kastës në pushtet dhe qytetarëve të zakonshëm.

Por kontrata e firmosur më 1 mars 2025 nuk ndalet vetëm te këshillimi ligjor. Ajo flet qartë për ndërhyrje strategjike, mediatike dhe politike, duke përfshirë lobim pranë Departamentit Amerikan të Shtetit dhe institucioneve të tjera të qeverisë amerikane. Në thelb: një përpjekje për të transformuar një çështje penale në një betejë lobimi ndërkombëtar.

Kjo është drejtësia me klasë biznes: e shtrenjtë, e blinduar dhe e paarritshme për shumicën. Ndërsa Veliaj përgatitet të paguajë edhe më shumë për betejën e tij, qytetarët shqiptarë ndjekin këtë spektakël me zemër të ngrirë. Sepse për ta, drejtësia është një derë që hapet rrallë, ndërsa për pushtetarët ajo blihet – ora pas ore, dollar pas dollari.

Në një vend ku varfëria është normale dhe korrupsioni është sistem, 300 mijë dollarë për të shpëtuar një njeri – është shumë më tepër sesa një kontratë ligjore. Është një dëshmi se si drejtësia dhe pasuria ndjekin rrugë krejt të ndryshme.