4 mln euro për Kanye West, Lapaj çon vendimin në Kushtetuese

Lëvizja politike “Shqipëria Bëhet” ka depozituar në Gjykatën Kushtetuese një kërkesë për të kundërshtuar vendimin e qeverisë që miratoi fondin prej rreth 4 milionë eurosh për organizimin e koncertit të artistit amerikan Kanye West, i planifikuar të zhvillohet nesër në Tiranë.

Gjatë një deklarate për mediat, drejtuesi i lëvizjes, Adriatik Lapaj, e cilësoi vendimin si një shembull të keq të administrimit të parave publike, duke akuzuar qeverinë për mënyrën se si po menaxhon fondet e taksapaguesve.

Lapaj u shpreh se “Shqipëria Bëhet” do të vijojë të ndjekë rrugët ligjore për të kundërshtuar çdo vendim që, sipas tij, cenon interesin publik, edhe pse pranoi se nuk ka mundësi të ndalojë menjëherë vendimmarrjet e ekzekutivit.

Ai përdori një gjuhë të ashpër ndaj qeverisë, duke deklaruar se është “fatkeqësi” mënyra se si funksionon shteti shqiptar dhe duke e krahasuar atë me një organizatë kriminale. Sipas Lapajt, dëmi ekonomik shkaktohet në momentin kur fondet shpërndahen, ndërsa rikuperimi i tyre përmes proceseve ligjore është shumë më i vështirë dhe kërkon kohë.

Debati për financimin e koncertit të Kanye West ka dominuar ditët e fundit skenën politike, me përplasje mes qeverisë dhe opozitës, ndërsa vendimi për përdorimin e fondeve publike vijon të jetë në qendër të polemikave.