Artistët pjesëmarrës janë Bora Baboçi, Alketa Ramaj, Jetmir Idrizi, Stefano Romano, Silva Agostini, Remijon Pronja, Alket Frashëri, Lek M Gjeloshi, Iva Lulashi, Fatlum Doçi.
Kjo ekspozitë realizohet me mbështetjen e Ministrisë së Kulturës.
“Nuk e pata menduar kurrë më parë se një ditë do të ftoja në Itali 10 artistë shqiptarë të artit kontemporan- shkruan Giuseppe Iannaccone – për të prezantuar veprat e tyre , sot që mundem ti shoh të gjithë së bashku, jam i bindur se, kur artistët bashkohen dhe prekin emocionin njerëzor, atëhere ndodh mrekullia”.
Art House është “Një vend – shprehet Adrian Paci – ku përcillen ide në një shtëpi private që hapet për komunitetin e qytetit të vet dhe ku bashkësia e një qyteti të vogël hyn në dialog me kontributet intelektuale dhe kulturore të botës së madhe të artit, pa humbur intimitetin dhe natyrën e ngushtë të marrëdhënies “.
Në hapësirat e firmës ligjore, midis veprave të Koleksionit Iannaccone, të rikonceptuar për këtë ngjarje do të ekspozohen edhe veprat e dhjetë artistëve kryesorë të programit Art House School 2017, shkruan Atsh.
Ekspozita çelet në 14 prill e do të vazhdojë të qëndroj e hapur për gjithë artdashësit deri 13 korrik 2018 në Collezione Giuseppe Iannaccone, Milano.
