Ministrja e Shëndetësisë Ogerta Manastirliu ka folur për masat e marra në spitale për situatën e krijuar nga koronavirusi.
Ajo ka thënë se është hapur spitali i dytë për shtrimin e pacientëve me koronavirus, dhe ky është spitali “Shefqet Ndroqi”, ndërsa pacientët e këtij spitali janë zhvendosur në spitalin e Elbasanit.
Në spitalin COVID-2 është kryer ndërhyrja e parë kirurgjikale tek e prekura me koronavirus.
“Kemi hapur edhe spitalin Covid 2, spitalin “Shefqet Ndroqi” i cili ka pritur pacientin e parë. Një rast suksesi i ekipit të kirurgjisë së këtij spitali, me mjekët kirurgë, anestezistë, infermierët dhe i gjithë stafi që kanë kryer me sukses ndërhyrjen kirurgjikale tek një e re e prekur nga COVID-19”, bëri të ditur Manastirliu.
“Ne do të vazhdojmë t’ju shërbejmë me përkushtimin dhe sakrificën e mjekëve, infermierëve, epidemiologëve tanë të mrekullueshëm. Ne do të vazhdojmë t’ju mbajmë të informuar me korrektësi dhe transparencë maksimale çdo ditë, çdo orë, për çdo zhvillim. Ndërsa JU, ju do të vazhdoni të zbatoni rigorozisht masat e higjenës dhe të distancimit social, si i vetmi mjet për të ndërmuar njëri-tjetrin në kët betejë të përbashkë”, tha ajo.
