Lulzim Basha mbrëmjen e sotme ka qenë i ftuar në emisionin ‘Tempora’, përballë gazetares Sonila Meço dhe avokatit e aktivistit Adriatik Lapaj.
Ky i fundit e pyeti Bashën nëse do të fshinte procedimet penale që janë bërë në mënyrë të paligjshme për aktivistët e qytetarët shqiptarë, që janë proceduar pasi kanë dalë në protestë për të drejtat e tyre.
Basha përveç këtij zotimi, tha se gjithashtu do të dënonte dhe përgjegjësit e dhunës, të cilët i ka me emra në listën e zezë, përpara tavolinës së tij të punës.
Lapaj: A zotoheni ju zoti Basha, si lideri i opozitës dhe një pretendent për kryeministër, që të fshini të gjitha procedimet e paligjshme ndaj ayre që kanë protestuar për të drejtat e tyre, dhe janë dhunuar e trajtuar barbvarisht nga policia, e në fund janë proceduar, në mënyrë të paligjshme?
Basha: Unë kam disa dokumente që nuk ndahen nga tavolina ime e punës. Një prej tyre është lista e aktivistëve të opozitës që protestojnë për të drejtat e tyre. Krahas tyre janë edhe emrat e atyre prindërve e fëmijëve, 18 e nën 18 vjeç, që janë trajtuar barbarisht nga policia. Me datë e emra. Kam dhe një listë të zezë, që unë e quaj lista e dhunuesve. Gjithsecili prej tyre që ka marrë pjesë në këto dhunime, nuk do të harrohet dhe nuk do të falet. Do vihet përpara përgjegjësisë maja e kupolës, e deri në fund. Ajo që më kërkovë ti është shumë pak, sepse do ndëshkojmë edhe ata që janë përgjegjës.
