Rama apel qytetarëve: Bëni vaksinën që të mbroheni, mos bini pre e teorive konspirative

Sipas kryeministrit Rama, varianti “Delta” është shqetësues, pasi përhapet në mënyrë të shpejtë dhe për ta parandaluar duhet që qytetarët të vaksinohen.

“Për tu mbrojtur nga varianti i ri është e rëndësishëm që të vaksinohemi.

Po ju flet një i vaksinuar, ja ku jam dhe kjo vlen për ata që janë skeptik, apo janë pre e teorive të konspiracionit.

Ne duhet të bëjmë gjithçka që kemi në dorë që edhe ata të kapërcejnë hendekun e konspiracionit”, tha Rama.

VARIANTI I RI I RREZIKSHEM

Kreu i qeverisë tha se varianti i ri i virusit është agresiv dhe i rrezikshëm.

“Përtej faktet që Shqipëria ka ecur mirë dhe është botërisht e klasifikuar në vendet e para sa i përket efikasitet të këtij procesi, varianti i ri është agresiv, përhapet shpejt dhe është i rrezikshëm ku kap ata që janë ta pavaksinuar.

Vaksinimi nuk e bën 100% të paprekshëm individin nga virusi, por e bën të dobët përballë individit.

Në ato raste kur preket një i vaksinuar, shanset e çuarjes në spital janë zero dhe simptomat janë të administrueshëm, pa dhimbje dhe pa vuajtur“, u shpreh kryeministri.