Elseid Hysaj pranon të sakrifikohet për skuadrën

Elseid Hysaj, edhe pse nuk e kishte provuar ndonjëherë në karrierë një pozicion të tillë, ka ditur që të përshtatet shpejt në krahun e majtë të mbrojtjes pas dëmtimit të Gulam.

Por me cilësitë që ka futbollisti i Kombëtares shqiptare pranon se nuk ka frikë të sakrifikohet dhe shënjestron Juventusin.

“Tri pikët e fituara kundër Udineses ishin jetike, sepse në këtë mënyrë mund të shkojmë më të karikuar në duelin me bardhezinjtë. Fituam 1-0, por skuadra tregoi se fizikisht është mirë dhe po arrin që të përballojë me forca maksimale çdo rival që kemi gjetur përpara.

A na tremb marshimi i Interit? E ndoqëm ndeshjen e tyre, por ishim të qetë, madje gjetëm edhe kohën për t’u dëfryer me njëri-tjetrin në grumbullim.

Me Juven, vendimtare? Objektivi është t’i fitojmë të gjitha ndeshjet deri në fund. Me Juventusin është normale që do të jetë e rëndësishme, por sfida si këto nuk kanë nevojë për një stërvitje speciale, pasi përgatiten vetvetiu psikologjikisht.

Roli i ri? Është disi e vështirë të ndërrosh menjëherë pozicion, por unë për Napolin sakrifikohem me qejf, si të gjithë që bëjnë pjesë në këtë grup dhe mendoj se jam ambientuar mirë”, ka thënë Hysaj.