Emigrimi tkurr popullsinë, në tre muajt e parë të vitit kishte më shumë vdekje sesa lindje

Me largimin e të rinjve nga Shqipëria, automatikisht ka rënë edhe numri i lindjeve, duke e theksuar edhe më shumë tkurrjen e madhe të popullsisë që vendi po përjeton veçanërisht në këto vite të fundit, ku largimi nga vendi është kthyer në një zgjedhje shumë të shpeshtë.

Rënia e lindjeve në tre muajt e fundit të këtij viti ka qenë aq e ulët sa rritja e popullsisë ka rezultuar negative, pra ka pasur më shumë vdekje sesa lindje. INSTAT bën me dije se në tre muajt e parë të këtij viti janë regjistruar 5164 lindje, 16.9% më pak se periudha e njëjtë e vitit të shkuar.

Sipas të dhënave historike të INSTAT, ky është numri më i ulët i lindjeve i regjistruar ndonjëherë në një tremujor, të paktën që pas viteve ‘90. Nga mesatarisht 8-10 mijë lindje, që regjistroheshin në vitin 2011, vitin e shkuar ky numër shkoi për herë të parë nën 6 mijë, teksa ky vit shënon një tjetër rekord. Ndërkohë, numri i vdekjeve ka rënë dhe është kthyer në nivelet e para pandemisë.

Në tre muajt e parë të këtij viti, në Shqipëri kanë humbur jetën 5557 persona, duke shënuar një rënie prej 31,6 %, krahasuar me tremujorin e parë 2022. Kombet e Bashkuara presin që popullsia totale banuese në vend, në vitin 2100, sipas variantit mesatar, do të zbresë në 1.1 milionë banorë.