Rasti i aktorit që s’kishte para për operim tek privati, mjeku Dasho: Qytetarët i bie të vdesin nëse s’shesin gjithçkaRasti i aktorit që s’kishte para për operim tek privati, mjeku Dasho:

Aktori Genc Fuga i është nënshtruar një ndërhyrjeje të vështirë kirurgjikale në një spital privat në vend, siç kanë njoftuar familjarët. Kostoja e lartë e kësaj ndërhyrjeje ka ndërgjegjësuar shumë miq të artistit, të cilat kanë kontribuuar në një llogari “gofundme” hapur nga e shoqja, por edhe ka ngritur shqetësimin e madh nga ekspertet për një reformim të në sistemin shëndetësor.
Mjeku Erion Dasho, në një postim në “FB” liston disa prej ndryshimeve urgjente që i duhen medoemos sistemit shëndetësor.
Ai shkruan:
DUHET NDRYSHIM! SA MË PARË!
Shumë shpesh shkruaj e flas për nevojën e reformimit të sistemit shëndetësor, për reformën në sistemin e financimit dhe pagesave (të cilin personalisht e shoh të lidhur me sigurimet shëndetësore sociale), etj., dhe jo rrallë marr komente se kjo gjë u duket shumë teorike lexuesve dhe dëgjuesve.

Sot, një ndër aktorët dhe regjisorët e njohur shqiptarë është duke u trajtuar në një strukturë shëndetësore private për një urgjencë shëndetësore dhe familjarët kërkojë ndihmë nëpërmjet mbledhjes së fondeve për të përballuar faturën e operacionit.
Ky rast hap një numër të pafund problemesh, ku unë do të veçoja:
Së pari, është turp për një shtet europian që një ndërhyrje kirurgjikale e urgjencës realizohet në një spital privat dhe jo në QSUT. Mjafton ky rast që QSUT, dikur e drejtuar edhe nga klarinetistë, të humbasë statusin e një qendre terciare.
Së dyti, është skandal që pagesa për shërbimet jetëshpëtuese të ofruara nga strukturat shëndetësore private nuk mbulohet nga Fondi i Sigurimeve Shëndetësore. Ka më shumë se dhjetë vjet që ka nisur blerja e shërbimeve private nga Fondi, por lista e shërbimeve që blihen ka mbetur e limituar dhe klienteliste.
Së treti, shqiptarët duhet të ndërgjegjësohen se mjekët janë duke u larguar jo vetëm jashtë vendit, por edhe brenda Shqipërisë janë duke braktisur sektorin publik. Fakti që një ndërhyrje neurokirurgjikale bëhet vetëm në një spital privat, flet shumë.
Duke i uruar aktorit shërim të shpejtë dhe të plotë dhe duke qënë i bindur se statura e tij do të bëjë të mblidhen jo 19 mijë eurot e nevojshme për të paguar ndërhyrjen kirurgjikale, por shumë më tepër se kaq, nuk mund të mos mendoj qytetarët e thjeshtë që ose duhet të shesin shtëpi e katandi për të përballuar fatura të tilla, ose duhet të vdesin.
Kjo situatë nuk mund të zgjasë më! Duhet ndryshim!