Vetingu, KPK shpall konfirmon gjyqtarin e Tiranës

Gjyqtari i Tiranës, Kujtim Vraniçi ka kaluar shkallën e parë të vetingut. Komisioni i Pavarur i Kualifikimit shpalli këtë të martë vendimin e konfirmimit të tij në detyrë.

Vraniçi u përball të hënën me Komisionin e Pavarur të Kualifikimit, kur gjatë  seances dha shpjegime të përmbledhura për gjetjet në kriterin e pasurisë dhe të profesionalizmit, në të cilat Komisioni nuk konstatoi probleme domethënëse. Për pastërtinë e figurës Vraniçi mori vlerësim pozitiv.

Procesi i vetingut për gjyqtarin Kujtim Vraniçi u krye nga trupa e KPK e kryesuar nga Olsi Komici, me relatore Firdes Shulin dhe anëtare Xhensila Pinen. Në cilësinë e vëzhgueses ndërkombëtare ishte e pranishme Marie Tuma.

Kujtim Vraniçi e ka nisur karrierën në sistemin e drejtësisë si ndihmës ligjor në Gjykatën e Lartë, ku punoi gjatë viteve 2003-2013. Në vitin 2014, ai u emërua inspektor në Këshillin e Lartë të Drejtësisë, ndërsa në vitin 2016 u emërua gjyqtar në Gjykatën e Tiranës, ku vazhdon ta ushtrojë funksionin edhe aktualisht.