Ish-kryeministri italian: Politika e kanabizuar një problem serioz

I ftuar në emisionin “Top Story” në Top Channel, ish-kryeministri italian dhe ish-presidenti i Komisionit Europian, Romano Prodi, ka komentuar situatën aktuale të politikës shqiptare, e cila referuar autoriteteve italiane  duket të jetë e përfshirë në aferat e drogës dhe krimit.

Në gjykimin e Prodit, në krahasim me vitin 1997, kjo çështje paraqitet tejet shqetësuese, pasi përfshirja e institucioneve përbën një problem serioz.

“Dikur ishte problem i popullit, ndërsa sot është problem individual në disa aspekte kriminale”, ka pohuar Prodi ndër të tjera.

“Unë s’jam ekspert i kësaj çështjeje. Sigurisht që çështja e përfshirjes politike në kanabis përbën një problem shumë serioz. E bën nevojën për bashkëpunim ndërkombëtar edhe më të fortë. Por për këtë arsye, tregohet një ndryshim shumë i madh me atë që ndodhi më parë. Natyrisht, nëse përfshihen politikanët, atëherë bëhet më e vështirë. Procesi për evidentimin, procesi për izolimin dhe ndëshkimin. Sepse është e qartë që ata do të kenë edhe më shumë mbrojtje. Ama, vazhdojnë të jenë në kuadrin e një anomalie kriminale. Ndërsa, në atë kohë, ishte frika e një populli të tërë”, ka deklaruar Romano Prodi.