Çfarë po bëhet me Aeroportin dhe Urën e Kukësit?

1. Çfarë u bë me aeroportin e Kukësit që s’po i dëgjohet më zëri?

Aeroporti i Kukësit, i promovuar me bujë si një nyjë e re e rëndësishme e transportit ajror në Shqipëri, duket se ka humbur shkëlqimin e tij fillestar. Pas një periudhe të shkurtër aktiviteti, shumë pak fluturime janë realizuar dhe ai qëndron më shumë bosh se sa aktiv. Investimi i madh i qeverisë, që u prezantua si një projekt madhor për zhvillimin e rajonit verior, po përballet me pikëpyetje të mëdha.

A ka ndonjë plan për ta rivitalizuar këtë aeroport?

Pse fluturimet janë kaq të rralla dhe pse operatorët ajrorë kanë hezituar të angazhohen më tej? Pse qeveria nuk ka ofruar asnjë raport të qartë mbi aktivitetin e aeroportit? Çfarë ndodh me kontratat e nënshkruara dhe paratë e investuara?

2. Ura e re 32 milionë euro në Kukës, pse nuk po hapet për kalim pasi u testua?

Ura e re e Kukësit, një investim prej 32 milionë euro, ishte premtuar si një strukturë që do të lehtësonte ndjeshëm lëvizjen dhe do të përmirësonte infrastrukturën lokale. Pas përfundimit dhe testimit të saj, ende nuk është hapur për kalim, duke shkaktuar konfuzion dhe zemërim mes banorëve dhe përdoruesve të rrugës.

Cilat janë arsyet e vërteta pas vonesës së hapjes së urës? A ka probleme strukturore që janë zbuluar pas testimit? Apo janë çështje burokratike dhe mungesë koordinimi ndërmjet institucioneve përgjegjëse? Pse nuk ka një komunikim të qartë dhe të hapur nga autoritetet për këtë çështje?

Qeveria  i ka quajtur  këto dy projekte madhore  shumë të rëndësishme për zhvillimin dhe mirëqenien e rajonit të Kukësit! A   është e domosdoshme të ketë transparencë dhe përgjigje të qarta për qytetarët dhe investitorët e interesuar. Çdo vonesë apo mungesë informacioni vetëm sa rrit mosbesimin dhe zhgënjimin në publik.