“Kampioni” i luftës kundër korrupsionit deklarohet i varfër!

Superheroi i Drejtësisë apo vegël e pushtetit? !

Në një klimë politike të helmuar nga korrupsioni dhe pandëshkueshmëria, imazhi i një “superheroi” që lufton të keqin është i mjaftueshëm për të rrëmbyer simpatinë e publikut. Por kjo strategji mediatike është një skemë e njohur për të shitur ideologjinë e luftëtarit të drejtësisë, ndërkohë që realiteti shpesh tregon një histori krejt tjetër.

Në qendër të këtij iluzioni është Altin Dumani, kreu i SPAK-ut, i cili është glorifikuar si luftëtari kryesor kundër korrupsionit në Shqipëri. Por përtej këtij fasade të ndritshme, a është ai vërtet i pastër, apo thjesht një vegël e Rilindjes në shërbim të interesave të saj?

Luftëtari i njëanshëm

Një vëzhgim i kujdesshëm i punës së SPAK tregon një prirje të qartë për të ndjekur penalisht vetëm ata individë dhe grupe që përbëjnë një kërcënim për pushtetin e kryeministrit Edi Rama. Ministrat aktualë dhe figura të rëndësishme të qeverisë nuk janë ndonjëherë nën lupën e këtij institucioni. Arsyeja? Me shumë gjasa, ata “kanë vjedhur me bekimin e Atit” dhe pas “rrëfimeve” të tyre, mëkatet e korrupsionit u janë falur.

Nga ana tjetër, individë si Arben Ahmetaj, të cilët kanë dalë nga kontrolli i Rilindjes, janë kthyer në objektiva të SPAK. Ahmetaj, i cili ishte i pari që “iu arratis bërjes kurban”, ka denoncuar hapur skemën SPAK-Rilindje, duke nxjerrë në pah një marrëdhënie të errët mes pushtetit dhe këtij institucioni.

Përtej asaj që shfaqet publikisht, pasuria e deklaruar e Altin Dumanit ngre më shumë pyetje sesa përgjigje. Sipas dokumenteve të aksesueshme, Dumani dhe bashkëshortja e tij deklarojnë një nivel pasurie që, në pamje të parë, nuk përputhet me kostot e larta të jetesës dhe investimeve të tyre.

Deklaratat e mëparshme tregojnë për investime të shumta në pasuri të paluajtshme dhe të ardhura nga qiratë e apartamenteve në Tiranë. Megjithatë, shumica e këtyre të ardhurave janë deklaruar në shifra minimale, duke ngritur dyshime mbi burimin real të tyre.

Ndërsa SPAK pretendon se po lufton korrupsionin në nivelet më të larta, kreu i tij duket të jetë i mbrojtur nga një mur i trashë mostransparence. Pasuria e tij dhe mënyra se si ajo është krijuar janë ende një mister, ndërkohë që qytetarët shqiptarë kërkojnë llogaridhënie nga ata që duhet të jenë të parët në përfaqësimin e ndershmërisë.

Ironia e luftës kundër korrupsionit

Ndërsa SPAK ka nisur disa procese kundër ish-zyrtarëve të opozitës dhe disa emrave të shquar, mungesa e veprimit ndaj ministrave aktualë të qeverisë Rama tregon një qasje selektive. Në vend që të shërbejë si një organ i pavarur dhe i drejtë, SPAK duket të jetë kthyer në një instrument për të përforcuar kontrollin e pushtetit mbi drejtësinë.

Deklaratat e pasurisë së Dumanit janë një simbol i qartë i kësaj ironie. Si mundet që një individ me një Golf modest dhe disa qira të përballojë standardin e tij të jetesës dhe të ketë burime të konsiderueshme për investime? Si është e mundur që një institucion që mburret për luftën kundër korrupsionit të drejtohet nga dikush me kaq shumë pikëpyetje mbi financat e tij?