Biznesmeni Gentjan Sula paraqitet në SPAK – Detajet

Biznesmeni i njohur në fushën e ndërtimit, Gentjan Sula është paraqitur në SPAK mesditën e kësaj të hëne.

Sula është larguar nga ambientet e Prokurorisë së Posaçme Anti-Korrupsion rreth orës 15:00 dhe raportohet se ka zgjatur gati tre orë. Biznesmeni nuk ka bërë deklarata për mediat, por është parë nga gazetarët teksa ka lënë ambientet e SPAK. Zyrtarisht nuk ka pasur një komunikim zyrtar se per çfarë çështje është marrë në pyetje Gentian Sula, megjithatë, sipas disa raportimeve mediatike, marrja e tij në pyetje ka qenë për banesën e kryetarit të bashkisë së Tiranës, Erjon Veliaj.

Ky i fundit ka deklaruar se prej vitesh jeton në rezidencën “Kodra e Diellit”, që është zhvilluar nga firma e ndërtimit të Sulës.

Po ashtu, në këtë ambient jetojnë edhe disa politikanë të rëndësishëm që janë nën mbikëqyrjen e SPAK-ut lidhur me hetimet e veçanta për pasuritë e tyre.

Emri i Gentjan Sulës përmendet edhe në dosjen hetimore në ngarkim të Ilir Metës dhe Monika Kryemadhit. Sipas hetimeve, biznesmeni Gentjan Sula i ka dhënë para cash nënës së Monika Kryemadhit, Fatime Kryemadhi, për të paguar kreditë.