A do bëjnë ndryshimin 220 mijë votat e emigrantëve?

Sot përfundon afati i regjistrimit të emigrantëve për të votuar në zgjedhjet parlamentare të 11 majit 2025, një proces i cili pritet të ndikojë ndjeshëm në rezultatin politik të vendit. Sipas Komisionit Qendror të Zgjedhjeve, deri më tani janë miratuar 225,797 kërkesa nga emigrantët për regjistrim, një shifër që tejkalon pritshmëritë dhe shënon një pjesëmarrje të lartë nga diaspora.

Ndër vendet me më shumë aplikime kryeson Italia me rreth 40.5% të totalit të regjistrimeve, e ndjekur nga Greqia (28.4%) dhe Gjermania (10%). Kjo shpërndarje reflekton edhe realitetin e emigracionit shqiptar në dekadat e fundit, ku këto vende kanë pritur kontingjentin më të madh të bashkatdhetarëve tanë.

Vendimi i djeshëm për të shtyrë regjistrimin vetëm për ata që janë refuzuar mund të sjellë një numër shtesë prej rreth 42,000 votuesish potencialë, duke e çuar pjesëmarrjen e mundshme të diasporës edhe më lart. Pavarësisht skepticizmit mbi ndikimin e drejtpërdrejtë të votës së emigrantëve, është e qartë se mbi 220 mijë zgjedhës jashtë vendit mund të jenë faktor vendimtar në balancën elektorale.

Çështja që mbetet e hapur është sa të organizuara janë forcat politike për të mobilizuar këtë trupë votuese dhe çfarë strategjish do të ndjekin për të tërhequr mbështetjen e tyre. Për herë të parë në histori, diaspora nuk është thjesht një zë kritik nga larg, por një aktor i drejtpërdrejtë në përcaktimin e së ardhmes politike të Shqipërisë.