Një konflikt i dhunshëm ka ndodhur mbrëmjen e së martës në fshatin Fierseman të Divjakës, ku një debat mes vëllezërve ka përfunduar në përleshje fizike dhe më pas në përdorimin e armës së zjarrit.
Sipas njoftimit zyrtar të Policisë së Fierit, rreth orës 20:00, shtetasi Zarif Konja, 58 vjeç, dhe shoku i tij A.G., 57 vjeç, kanë dhunuar fizikisht me grushte Shpëtim Konjën, 50 vjeç i cili është vëllai i Zarifit.
Pas dhunës së ushtruar ndaj tij, Shpëtim Konja është kundërpërgjigjur duke qëlluar me një armë gjahu që e kishte me leje, duke dëmtuar automjetin e A.G.-së. Fatmirësisht, nuk raportohet për persona të lënduar nga përdorimi i armës.
Policia ka shoqëruar në komisariat Shpëtim Konjën, ndërkohë që dy personat e tjerë, Zarif Konja dhe A.G., janë shpallur në kërkim. Paraprakisht dyshohet se shkak për përplasjen është bërë një mosmarrëveshje për çështje pronësie.
Grupi hetimor vijon punën për dokumentimin e plotë të ngjarjes dhe për kapjen e personave në kërkim.
