Theth,banorët futen në ndërtesë për të ndalur fadromat

Një situatë e tensionuar është zhvilluar sot gjatë orëve të paradites në një nga zonat ku po vijon aksioni i prishjes së ndërtimeve pa leje. Policia ka krijuar një kordon sigurie për të mundësuar vijimin e operacionit, duke tentuar të largojë qytetarët nga zona, por përballja me banorët ka shkaktuar rritje të ndjeshme të tensioneve.

Fadromat kanë tentuar të nisin shembjen e objektit, por janë ndalur përkohësisht pasi në ndërtesë janë futur anëtarët e familjes që refuzojnë të dalin. Me këtë veprim ata kanë vënë në rrezik edhe jetën e tyre, në përpjekje për të mbrojtur shtëpinë që pretendojnë se e kanë ngritur me sakrifica.

Prishja e godinës së fundit pa leje në Theth është shoqëruar me skena të tensionuara dhe përplasje të forta mes banorëve dhe autoriteteve.

Fadroma e IKMT-së mbërriti në objektin e fundit të listuar për shembje, por u përball me rezistencën e fortë të banorëve, të cilët kërkuan një vendim gjykate që të justifikonte ndërhyrjen.

Banorët u ulën në rrugë, duke bllokuar kalimin e mjeteve të IKMT-së dhe duke e kthyer terrenin në një skenë proteste. Ndërsa situata përshkallëzohej, forcat e policisë ndërhynë fuqishëm, duke krijuar një kordon sigurie dhe më pas duke hyrë me forcë në banesë. Banorët, u nxorën me dhunë nga shtëpia që përpiqeshin të mbronin.

Pavarësisht rezistencës së tyre, pas disa orësh tension dhe përballje, godina u shemb. Banorët e tronditur paralajmërojnë për hapa ligjorë dhe nuk përjashtojnë protesta të reja kundër veprimeve të cilësuara prej tyre si të padrejta dhe brutale.