Shkëndija ‘fiket’ në ndeshjen e parë ndaj Qarabag!

Shkëndija e Tetovës u mund me rezultatin e ngushtë 1-0 nga Qarabagu i Azerbajxhanit në ndeshjen e parë të turit të tretë kualifikues të Ligës së Kampionëve, zhvilluar në stadiumin e qytetit të Tetovës. Golin e vetëm të takimit e shënoi Junis Bayramov nga pika e penalltisë në minutën e 18-të, duke i dhënë avantazhin skuadrës azere.

Në pjesën e parë, Qarabagu dominoi lojën dhe arriti të krijojë disa mundësi, por goli i hershëm nga penalltia u tregua vendimtar. Shkëndija, e drejtuar nga trajneri Jeton Beqiri, u përpoq të reagojë në fraksionin e dytë, duke krijuar disa raste për të barazuar rezultatin. Megjithatë, vendasit nuk ia dolën të shfrytëzojnë mundësitë e tyre, me një moment të veçantë në minutat e fundit kur Besart Ibraimi shpërdoroi një mundësi të artë për të vendosur ekuilibrin.

Pavarësisht disfatës, Shkëndija tregoi shpirt luftarak dhe mbetet me shpresa për ndeshjen e kthimit, që do të zhvillohet javën e ardhshme në Baku. Skuadra tetovare do të ketë nevojë për një përmbysje për të avancuar në fazën tjetër të garës më prestigjioze evropiane.