“Kujtime të bukura”, Kim Jong Un bëhet nostalgjik për Trump-in

Udhëheqësi i Koresë së Veriut, Kim Jong Un, është bërë nostalgjik teksa deklaroi se ka “kujtime të bukura” me Presidentin e SHBA-së, Donald Trump, duke shtuar se është i hapur për bisedime të ardhshme me Shtetet e Bashkuara, përsa kohë që mund të mbajë armët e tij bërthamore.

Kim u takua me Trumpin tri herë gjatë mandatit të parë të presidentit amerikan për samite të nivelit të lartë, para se bisedimet të dështonin në vitin 2019 në Hanoi, për shkak të mosmarrëveshjeve mbi lëshimet që Pheniani ishte i gatshëm të bënte lidhur me arsenalin e tij bërthamor.

Kërkesa e SHBA-së që Kim të heqë dorë nga armët e ndaluara bërthamore ka qenë një nga pikat kryesore të tensioneve midis dy shteteve, me Korenë e Veriut nën sanksione të ashpra të OKB-së për shkak të aktiviteteve të saj bërthamore dhe raketore.

Në një fjalim para parlamentit të Koresë së Veriut, Kim tha: “Nëse Shtetet e Bashkuara e hedhin poshtë fiksimin e tyre iluziv me denuklearizimin dhe, bazuar në njohjen e realitetit, dëshirojnë vërtet bashkëjetesë paqësore me ne, atëherë nuk ka asnjë arsye pse të mos e përmbushim atë.”

Ai gjithashtu shtoi: “Unë ende ruaj kujtime të bukura me presidentin aktual të SHBA-së, Trump.”

Pas samitit në vitin 2019, Koreja e Veriut ka insistuar vazhdimisht se nuk do të heqë dorë nga armët e saj bërthamore. Kim Jong Un ka theksuar se denuklearizimi nuk është një mundësi bisedimesh.