Një figurë e panjohur për Avokatin e Popullit me hije skandalesh në sfond

Partia Demokratike pritet të shkojë drejt një emri të vetëm për postin e Avokatit të Popullit, dhe sipas burimeve nga grupi parlamentar, zgjedhja duket të jetë fokusuar tek Jola Hysaj. Një emër pak i njohur për publikun e gjerë, e cila zyrtarisht mban funksionin e sekretares për marrëdhëniet me publikun në PD dhe vjen nga Durrësi.

Megjithëse lidhja e saj me PD-në është shfaqur kohët e fundit përmes daljeve publike, promovimi i Hysajt nuk duket të ketë rrënjë politike por buron nga bashkëshorti i saj, Leonard Kadrimi, ish-zëvendësdrejtor i Kadastrës Durrës, i arrestuar një vit më parë për tjetërsim prone prej 448 mijë m².

Në periudhën kur Kadrimi ishte në detyrë, Jola Hysaj dilte në foltoret e PD për të denoncuar qeverinë Rama, por asnjëherë skandalet e pronave në Durrës shtrohen si pyetje të hapura. Në një intervistë televizive tre vite më parë në Klan, Hysaj foli për jetën luksoze në banesën e saj, por videoja më pas u hoq nga YouTube – një detaj që ngre diskutime mbi imazhin publik që kërkohet të ruhet para kandidimit.

Raportet tregojnë se karriera dhe afrimi i saj me PD është lidhur më shumë me marrëdhëniet e biznesit të tokave mes Kadrimit dhe Shkëlzen Berishës, ku sipas të njëjtave burime, bashkëpunimi ka qenë i ngushtë. Pikërisht kjo ka krijuar debat të brendshëm, pasi një parti me qindra juristë e profesionistë nuk paraqet një kandidaturë të pastër ligjore, por zgjedh pikërisht një figurë të lidhur me procese pronash dhe hetime aktive.

Kujtojmë se bashkëshorti i Hysajt u arrestua në prill 2024, u lirua në korrik të po atij viti dhe dosja ndaj tij vazhdon të jetë nën hetim. Megjithatë, kjo nuk e ka penguar që sot emri i saj të qarkullojë si kandidatura kryesore e PD-së për Avokatin e Popullit.

Nga ana tjetër, Sali Berisha del publikisht dhe përmend si kandidat Besim Ndregjonin, 77 vjeç, edhe pse kriteret ligjore për moshën e Avokatit të Popullit janë më të ulëta se kjo – detaj që e di si ai, ashtu edhe mazhoranca. Megjithatë, loja parlamentare duket të shkojë drejt kompromisit të heshtur mes palëve.

Në një situatë ku opozita pretendon të rikthejë besimin publik, zgjedhja e një kandidateje të lidhur me skandale dhe hetime të vazhdueshme për prona ngre pikëpyetje serioze:
• A është kjo fytyra më e denjë që PD ofron për mbrojtësin e të drejtave të qytetarëve?
• Pse një parti me kapacitete ligjore të mëdha bie pikërisht tek një emër i kontestuar?
• A është ky vendim produkt i meritës, apo i pazareve politike?

Nëse zgjedhja finalizohet, duket se PS dhe PD – ndonëse në retorikë përplasen – gjejnë gjuhë të përbashkët kur bëhet fjalë për interesa dhe njerëz që u vlejnë të dyja palëve.

Në fund, mbetet ndjesia se skenari në Parlament është i njëjtë:
ndryshojnë aktorët, por pazaret rrijnë po aty.