Balluku e pandehur nga SPAK, opozita ‘derdhet’ sot në protestë

Opozita pritet të zbresë sot në një protestë kombëtare, të cilën e cilëson si reagim qytetar ndaj korrupsionit qeveritar dhe pasojave të tij të drejtpërdrejta në jetën e qytetarëve. Sipas saj, keqqeverisja ka prodhuar varfërim, pasiguri dhe ka cenuar rëndë standardet e zgjedhjeve të lira dhe të barabarta.

Në fokus të tubimit janë akuzat e fundit që rëndojnë mbi zëvendëskryeministren dhe njëherazi ministren e Infrastrukturës dhe Energjisë, Belinda Balluku. Emri i saj është përmendur në disa afera që lidhen me tendera me vlerë miliona euro, përfshirë projektet e Unazës së Madhe dhe Tunelit të Llogarasë.

Opozita u ka bërë thirrje qytetarëve për pjesëmarrje masive në protestën që do të mbahet në orën 18:00 para Kryeministrisë. Ndërkohë, kryetari i Partisë Demokratike, Sali Berisha, ka hedhur akuza të forta ndaj Ballukut, duke pretenduar se ajo zotëron qindra apartamente dhe dy jahte.

Sakaq, Balluku është marrë zyrtarisht e pandehur nga SPAK, ndërsa vijon procedura për heqjen e imunitetit parlamentar, pas kërkesës së Prokurorisë së Posaçme. Ky proces, nëse përfundon, mund të çojë drejt masave penale ndaj figurës së dytë më të rëndësishme të qeverisë.