Zbardhet mesazhi i dërguar tek anëtarët e PD-së

Akuza se organizohet nga Benet Beci dhe i shërben axhendës së Ramës

Ish-deputeti demokrat Ervin Salianji ka paralajmëruar një tjetër takim në qytetin e Shkodrës, i cili duket se ka shqetësuar drejtuesin e Partisë Demokratike, Sali Berisha. Ky i fundit u ka bërë thirrje demokratëve të mos marrin pjesë në foltoren e organizuar nga Salianji.

Pas polemikave të mëparshme që e lidhnin me figura të dyshimta kriminale, tani zyrtarët e PD-së e kritikojnë ish-deputetin, duke theksuar se organizimi i takimit të sotëm në Shkodër është nën kujdesin e Benet Becit.

Në mesazhin e dërguar për anëtarët e Partisë Demokratike, theksohet se takimi ka karakter privat dhe nuk ka asnjë lidhje me strukturat zyrtare të PD-së. Për më tepër, theksohet se ky aktivitet duket se i shërben interesave politike të kryeministrit Edi Rama.

“Ky takim është i organizuar në mënyrë tërësisht private, pa lidhje me Partinë Demokratike, nga Benet Beci dhe falanga e tij. Për më keq, duket se ka edhe mbështetje nga individë me precedentë penalë. Dega e PD-së në Shkodër u bën thirrje anëtarëve të distancohen, pasi ky aktivitet i shkon për shtat axhendës së qeverisë,” thuhet në mesazhin zyrtar.

Sali Berisha ka paralajmëruar mundësinë e përjashtimit të Salianjit nga Kryesia, ndërsa ish-deputeti ka deklaruar se qëllimi i takimeve të tij është rivitalizimi i degëve të PD-së që janë lënë pas dore dhe rikthimi i pjesëmarrjes aktive të demokratëve.