Sot 558-vjetori i vdekjes së Gjergj Kastriot Skënderbeut

Sot përkujtohen 558 vite nga ndarja nga jeta e Heroit Kombëtar të shqiptarëve, Gjergj Kastrioti Skënderbeu (17 janar 1468), figura që mishëron më fort se kushdo tjetër historinë, identitetin dhe qëndresën e një kombi.

Skënderbeu nuk është thjesht personaliteti më i shquar i historisë sonë, por simboli i një epoke vendimtare, kur shqiptarët u bashkuan përballë rrezikut të zhdukjes dhe mbrojtën me vendosmëri lirinë e tyre. Ai lindi në vitin 1403, në familjen fisnike të Kastriotëve. I ati, Gjon Kastrioti, ishte një nga sundimtarët më të fuqishëm të kohës, ndërsa e ëma, Vojsava, mbetet një figurë e respektuar e historisë arbërore.

Në moshë të re, Gjergj Kastrioti u dërgua peng në oborrin osman, ku u edukua dhe u stërvit në artin e luftës dhe të diplomacisë. Pikërisht aty ai fitoi njohuritë ushtarake që më vonë do t’i shërbenin në mënyrë vendimtare për t’u përballur me perandorinë më të fuqishme të kohës.

Pas kthimit në atdhe, Skënderbeu u shndërrua shpejt në udhëheqësin e padiskutueshëm të shqiptarëve, duke bashkuar principatat arbërore në një aleancë të gjerë kundër pushtimit osman. Ai hyri në histori si një nga strategët më të mëdhenj ushtarakë të Mesjetës, duke arritur me forca të kufizuara të përballonte dhe të mposhtte ushtri shumë herë më të mëdha e më të organizuara.

Më 28 nëntor 1443, pas çlirimit të Krujës, Skënderbeu ngriti flamurin e Kastriotëve, duke shënuar një moment historik për shqiptarët. Pak muaj më vonë, më 2 mars 1444, në Lezhë u mbajt Kuvendi i Parë Kombëtar, ku u hodhën themelet e bashkimit politik dhe ushtarak të vendit.

Ky kuvend shënoi fillimin e një organizimi të ri shtetëror dhe një kryengritjeje të përgjithshme që u përhap në mbarë trojet shqiptare. Brenda një kohe të shkurtër u çliruan disa principata, ndërsa forcat shqiptare fituan beteja të rëndësishme në shumë zona strategjike, duke dëshmuar forcën dhe vendosmërinë e qëndresës arbërore.

Pas një jete të tërë të përkushtuar luftës për liri dhe mbrojtjes së vendit, Gjergj Kastrioti Skënderbeu u nda nga jeta në Lezhë. Trashëgimia e tij mbetet e pavdekshme: ai jo vetëm mbrojti tokat shqiptare, por ndaloi avancimin osman drejt Evropës, duke fituar respektin dhe mirënjohjen e fuqive evropiane dhe të Selisë së Shenjtë.

Skënderbeu mbetet sot e kësaj dite simboli i guximit, bashkimit dhe dinjitetit kombëtar të shqiptarëve.