Anuela Ristani i jep 2 miliardë lekë Breçanit të ruajë Shoshin e UKT

Teksa qytetarët e Tiranës, si taksapagues, mbushin buxhetin e institucioneve bashkiake, në shumë lagje të kryeqytetit çezmat vazhdojnë të jenë pa ujë. Ndërkohë, paratë e tyre duket se përdoren për prioritete krejt të tjera. Kryetarja e Bashkisë Tiranë, Anuela Ristani, ka miratuar dhënien e fondeve publike për një kompani private, e cila siguron ruajtjen e drejtorit të Ujësjellës-Kanalizimeve Tiranë (UKT), Flauers Shoshi.

Paratë e tenderave të Bashkisë, me objekt Ujësjellës-Kanalizime Tiranë, janë kanalizuar drejt një kompanie me lidhje të forta politike dhe policore. Një procedurë e fundit prokurimi, e shënuar me “flamur të kuq” për mungesë konkurrence — element i njohur si indikator i qartë korrupsioni — tregon se mbi 2.1 miliardë lekë i janë dhënë kompanisë “BREÇANI – R.O.S.P”.

Tenderi është zhvilluar me pjesëmarrjen e vetëm një operatori ekonomik, çka e bën garën faktikisht fiktive, pa asnjë rival që të ndikonte në uljen e çmimit. Diferenca mes fondit limit dhe ofertës fituese është thuajse zero: kompania ka fituar me rreth 99.5% të fondit limit, një tregues i qartë i mungesës së konkurrencës reale.

Kompania përfituese, “BREÇANI – R.O.S.P” sh.p.k., figuron zyrtarisht në emër të Fatbardh Breçanit, vëllait të ish-zëvendësdrejtorit të Policisë së Shtetit, Erzen Breçani. Ky fakt ngre pikëpyetje serioze mbi ndikimin që ish-zyrtarë të lartë të rendit, apo familjarët e tyre, mund të kenë në përfitimin e tenderave me vlera miliona euro nga institucionet nën varësinë e Bashkisë Tiranë.

Ironia qëndron në faktin se, ndërsa Bashkia shpenzon mbi 2 miliardë lekë për ruajtje private, shërbimi bazë ndaj qytetarëve mbetet në nivele kritike: furnizimi me ujë është i ndërprerë, investimet në rrjet janë minimale dhe pakënaqësia e banorëve rritet çdo ditë.

Në fund, taksat e qytetarëve nuk po shndërrohen në shërbime, por në kontrata që ushqejnë klientelizmin dhe mbajnë gjallë një sistem ku interesat private vihen mbi nevojat publike.