Plagosja e turkut në Sauk, publikohet fotoja e autorit

Një ngjarje e rëndë është regjistruar mbrëmjen e djeshme në zonën e Saukut të Vjetër në Tiranë, ku një shtetas turk ka mbetur i plagosur pas të shtënave me armë zjarri nga një bashkëkombës i tij.

I plagosuri është 36-vjeçari Halil Uçar, i cili u qëllua brenda një lokali. Ai është marrë në pyetje nga hetuesit, por nuk ka pranuar të bashkëpunojë plotësisht me autoritetet, duke deklaruar se nuk e njeh autorin dhe se nuk ka pasur konflikte me të.

Sipas të dhënave paraprake nga policia, autori dhe viktima ndodheshin në tavolina dhe në kate të ndryshme të lokalit. Pasi kishte konsumuar darkën në katin e parë, autori është ngjitur në katin e dytë të lokalit, ku ndodhej Uçari, dhe ka hapur zjarr ndaj tij.

Plumbi e ka goditur 36-vjeçarin në shpatull, ndërsa autori është larguar menjëherë nga vendi i ngjarjes.

Nga kamerat e sigurisë policia ka siguruar disa foto të autorit, ndërsa hetuesit po punojnë për krijimin e identikitit të tij.

Në vendngjarje janë mbledhur materiale gjenetike që mund të ndihmojnë në identifikimin e autorit. Paralelisht, përmes Interpol, autoritetet shqiptare po bashkëpunojnë me autoritetet turke për të zbardhur identitetin e tij dhe për të verifikuar nëse mes dy shtetasve turq ka pasur konflikte të mëparshme në Turqi.

Hetimet për zbardhjen e plotë të ngjarjes vijojnë.