Një banesë private e pabanuar është përfshirë nga flakët mëngjesin e së martës në Elbasan, duke shkaktuar alarm në zonë.
Sipas informacioneve paraprake, zjarri ka rënë rreth orës 08:05 në zonën e njohur si “Kryqëzimi i 1 Majit”, ku flakët kanë shpërthyer brenda një shtëpie të braktisur.
Pas njoftimit, në vendngjarje kanë ndërhyrë menjëherë forcat zjarrfikëse, të cilat kanë bërë të mundur izolimin e flakëve dhe shmangien e përhapjes së tyre në banesat përreth.
Nga të dhënat e para, dyshohet se zjarri mund të jetë shkaktuar qëllimisht ose aksidentalisht, duke marrë parasysh se banesa e pabanuar mund të jetë përdorur nga persona që frekuentojnë ambiente të tilla.
Autoritetet policore kanë nisur hetimet për të sqaruar rrethanat dhe për të përcaktuar shkakun e saktë të zjarrit.
