Çfarë po ‘vlon’ nga dosja e ‘nxehtë’? SPAK ‘nuhat’ pasuritë e Belës

Prokuroria e Posaçme kundër Korrupsionit dhe Krimit të Organizuar (SPAK) ka thelluar hetimet ndaj ish-zv/kryeministres dhe ish-ministres së Infrastrukturës, Belinda Balluku, në kuadër të një çështjeje që lidhet me procedurat e prokurimit publik dhe tenderë me vlera të larta.

Sipas burimeve mediatike, në ditët e fundit janë kryer një sërë veprimesh hetimore nga Byroja Kombëtare e Hetimit (BKH) në bashkëpunim me prokurorët e SPAK. Këto veprime vijnë pas dyshimeve të ngritura për parregullsi në procedura të caktuara, ndërsa Gjykata e Posaçme (GJKKO) ka autorizuar kontrolle ndaj personave të ndryshëm që mund të kenë lidhje me çështjen, përfshirë zyrtarë dhe individë të tjerë nën verifikim.

Një pjesë kyçe e hetimeve lidhet me analizimin e materialeve të sekuestruara gjatë kontrolleve, ku përfshihen telefona celularë dhe pajisje të tjera elektronike. Nga këto burime po shqyrtohen komunikime dhe dokumente që mund të hedhin dritë mbi mënyrën e zhvillimit të procedurave të dyshuara.

Paralelisht, hetuesit po verifikojnë edhe të dhëna mbi pasuri të mundshme që dyshohet se mund të jenë regjistruar në emër të personave të tretë. Megjithatë, deri në këtë fazë nuk ka një konfirmim zyrtar nga SPAK për ekzistencën e pasurive të fshehura apo për akuza të reja konkrete. Raportimet flasin për një portofol të gjerë pronash të paluajtshme, përfshirë apartamente dhe vila në zona strategjike, kryesisht në Tiranë dhe në bregdet.

Këto zhvillime pasojnë veprime të mëparshme hetimore, gjatë të cilave janë sekuestruar dokumente dhe pajisje me interes për çështjen. Ndërkohë, SPAK ka aktivizuar edhe mekanizma të bashkëpunimit ndërkombëtar për sigurimin e informacionit shtesë.

Aktualisht, ndaj Ballukut janë raportuar masa sigurie si ndalimi i daljes jashtë vendit dhe pezullimi nga funksionet publike. Hetimet fokusohen në dyshimet për shkelje të barazisë në tendera dhe ankande publike, veçanërisht në lidhje me procedurat për ndërtimin e Tunelit të Llogarasë.

Gjithashtu, në vëmendjen e hetuesve janë edhe disa procedura të tjera që lidhen me projektet e Unazës së Madhe në Tiranë, për të cilat verifikimet vijojnë.