Sherr mes kushërinjve në Lushnjë, TikTok-eri plagos të afërmin

Një konflikt i rëndë mes dy kushërinjve në Lushnjë ka përshkallëzuar në dhunë fizike, duke rrezikuar seriozisht jetën e njërit prej tyre. Ngjarja, e ndodhur mbrëmjen e kaluar, ka tronditur zonën dhe për pak sa nuk përfundoi në pasoja fatale.

Sipas informacioneve, autori i dyshuar është 60-vjeçari Izet Ymeri, i cili ka goditur me thikë kushëririn e tij, 70-vjeçarin Faslli Ymeri. Dyshohet se konflikti ka lindur për motive të dobëta, por ka degraduar në përdorimin e mjetit prerës, duke shkaktuar plagë të rënda tek i moshuari.

I plagosuri është transportuar me urgjencë drejt një spitali në Tiranë për trajtim më të specializuar mjekësor. Burime bëjnë me dije se, fatmirësisht, ai ndodhet jashtë rrezikut për jetën.

Menjëherë pas ngjarjes, forcat e policisë kanë ndërhyrë duke arrestuar autorin e dyshuar. Ndaj tij rëndon akuza për veprën penale “plagosje e rëndë me dashje”.

Izet Ymeri njihet edhe në rrjetet sociale, veçanërisht në TikTok, ku ka qenë aktiv dhe shpesh është shfaqur në video së bashku me reperin Kleviol Ahmeti, duke realizuar përmbajtje të ndryshme që kanë tërhequr vëmendjen e ndjekësve.

Ngjarja mbetet nën hetim për të zbardhur plotësisht rrethanat dhe motivet që çuan në këtë akt dhune mes familjarëve.