Frika e mungesave rikthen studentët në auditore (Denoncimet)

Pas disa ditësh protestash me radhë dhe bojkotimi të procesit mësimor, një pjesë e studentëve në Universitetin e Tiranës dhe Universitetin e Mjekësisë janë rikthyer këtë të hënë në auditorë. Rikthimi është konstatuar në Fakultetin e Ekonomisë, Fakultetin e Shkencave të Natyrës (FSHN) dhe në Universitetin e Mjekësisë, ndërsa mbetet e paqartë nëse kjo lëvizje shënon një dobësim të bojkotit apo thjesht një ndërprerje të përkohshme të tij.

Arsyeja kryesore që i ka shtyrë studentët të rifillojnë ndjekjen e leksioneve dhe seminareve lidhet me shqetësimin për grumbullimin e mungesave dhe pasojat që mund të kenë ato në vijimësinë e studimeve.

Aktivistja Arvina Lleshi ka bërë publike disa mesazhe të mbërritura nga studentët, të cilët shprehin pakënaqësi për mënyrën se si është trajtuar kërkesa e tyre lidhur me mungesat gjatë periudhës së bojkotit.

Sipas komunikimeve të publikuara, studentët pretendojnë se u është dashur të rikthehen në mësim, pasi nuk kanë marrë një përgjigje nga dekanatet për kërkesën që kishin paraqitur. Në mungesë të një qëndrimi të qartë institucional, ata kanë zgjedhur të mos rrezikojnë penalizimin për shkak të mungesave të akumuluara.

Ky zhvillim vjen në një moment kur protesta studentore vijon të jetë e pranishme në debatin publik, ndërsa rikthimi në auditorë në disa fakultete ngre pikëpyetje mbi ecurinë e bojkotit dhe qëndrueshmërinë e mobilizimit.

Megjithatë, kthimi i një pjese të studentëve në mësim nuk përbën domosdoshmërisht përfundimin e protestës. Mbetet për t’u parë nëse bëhet fjalë për një rikthim të përgjithshëm në procesin akademik apo për një vendim individual të studentëve të shqetësuar për pasojat e mungesave.