Aeroporti i Malpensas merr emrin “Silvio Berlusconi”

Aeroporti i Malpensas në Itali tashmë mban zyrtarisht emrin “Silvio Berlusconi”, në kujtim të ish-kryeministrit italian dhe themeluesit të Mediaset.

Emërtimi i ri u inaugurua të premten gjatë një ceremonie të zhvilluar në aeroportin e Vareses, ku morën pjesë familjarë të Berlusconit, përfaqësues të lartë të politikës dhe institucioneve italiane.

Në aktivitet ishte edhe vajza e ish-kryeministrit, Marina Berlusconi, e cila foli me emocion për vendimin që një prej aeroporteve më të rëndësishme të vendit të mbajë emrin e babait të saj. Ajo tha se ndihej krenare që emri i tij do të lidhej me një aeroport që çdo ditë shërben për mijëra pasagjerë nga vende të ndryshme të botës.

Duke kujtuar figurën e të atit, Marina e përshkroi Silvio Berlusconin si një person që “gjithmonë kërkonte dialogun me të gjithë”.

Edhe vëllai i tij, Paolo Berlusconi, mori fjalën gjatë ceremonisë. Ai e cilësoi Malpensën si një pikë lidhëse mes Italisë, Evropës dhe pjesës tjetër të botës, duke e paraqitur vendosjen e emrit të Berlusconit si një mënyrë për të ruajtur kujtimin dhe trashëgiminë e tij.

“Sot Silvio nuk është më, por është më i gjallë se kurrë”, deklaroi Paolo Berlusconi, duke iu referuar ndikimit që ish-kryeministri pati në fusha të ndryshme, nga biznesi dhe media te sporti dhe politika.

Në ceremoninë e inaugurimit morën pjesë presidenti i Senatit, Ignazio La Russa, presidenti i Lombardisë, Attilio Fontana, si dhe zëvendëskryeministri Matteo Salvini.

Salvini e vlerësoi Berlusconin si një prej sipërmarrësve më të rëndësishëm në historinë politike italiane. Sipas tij, vendimi për t’i dhënë emrin e ish-kryeministrit aeroportit nuk duhet parë si një akt me karakter partiak, por si njohje e rolit që ai ka luajtur në jetën publike të Italisë.

Megjithatë, vendimi për emërtimin e Malpensës nuk ka kaluar pa kundërshtime politike.

Kryebashkiaku i Milanos, Giuseppe Sala, mungoi në ceremoninë zyrtare. Salvini shprehu keqardhje për mungesën e tij, ndërsa Sala ka bërë të ditur se e kishte kundërshtuar vendimin për ndryshimin e emrit të aeroportit. Për këtë arsye, ai argumentoi se pjesëmarrja në ceremoni nuk do të ishte në përputhje me qëndrimin që kishte mbajtur.

Në lidhje me ceremoninë reagoi edhe Marta Fascina, ish-partnerja e Berlusconit dhe deputete e Forza Italia-s. Në një postim në Instagram, ajo shkroi se, duke nisur nga tani, sa herë që një udhëtar të niset nga aeroporti “Silvio Berlusconi” dhe të ngrihet në qiell, ish-kryeministri do të jetë aty për ta shoqëruar.

Fascina iu drejtua gjithashtu kritikëve të Berlusconit, duke deklaruar se ata do të vazhdojnë të përballen me madhështinë që, sipas saj, karakterizonte ish-kryeministrin italian.