Agjjenti i Krimeve që shpërndante kokainë në zonën e ish-Bllokut

Detaje nga arrestimi i agjentit te krimeve te Komisariatit Nr.2 të Tiranës, i cili u prangos  dje nga Shërbimi për Çështjet e Brendshme dhe Ankesat, pasi dyshohet se ishte përfshirë në një rrjet të shpërndarjes së drogës.

Efektivi i arrestuar është Ledion Bako, 27 vjeç. Ai u ndalua gjatë një operacioni, i cili kishte për qëllim goditjen e një grupi që merrej me shpërndarjen e lëndëve narkotike. Agjenti i Krimeve, Ledion Bako, është ndaluar mbrëmjen e së martës në zonën Linzës, në momentin kur po udhëtonte me makinë së bashku me tre persona të tjerë.

Burime nga Policia thanë se efektivit 27- vjeçar i është gjetur një sasi droge dhe një armë pa leje. Në momentin e ndalimit të tij u krye arrestimi edhe i 3 personave që po urdhëronin me të. Hetimet për këtë rast kishin nisur rreth tre muaj më parë dhe ka qenë Sektori i Forcave Operacionale të Policisë së Tiranës që ka dhënë sinjalizimin e parë për përfshirjen e një efektivi Policie, në shpërndarjen e kokainës në zonën e ish-Bllokut.

Ky informacion u është përcjellë menjëherë strukturave të Shërbimit për Çështjet e Brendshme dhe Ankesat në Tiranë, duke qenë se bëhej fjalë për një agjent krimesh. Më pas, gjatë hetimeve intensive, në bashkëpunim me Prokurorinë e Tiranës u arrit dokumentimi me prova ligjore dhe arrestimi i efektivit të Policisë e bashkëpunëtorëve të tij.

HETIMI

Ministria e Brendshme tha dje se Shërbimi për Çështjet e Brendshme dhe Ankesat, mbi bazën e të dhënave që dispononte rreth implikimit të një punonjësi Policie në veprimtari të kundërligjshme në fushën e narkotikëve, në bashkëpunim me Prokurorinë e Tiranës zhvilloi një hetim të plotë, duke aplikuar metoda speciale hetimi.

Nga hetimet për rreth 3 muaj u siguruan prova se punonjësi i Policisë, në bashkëpunim me persona të tjerë, përveç se ishin përdorues, shpërndanin edhe lëndë narkotike. Ai, duke keqpërdorur atributet që i jepte detyra, siguronte mbarëvajtjen e këtij aktiviteti të kundërligjshëm. Nisur nga rrethanat, faktet e paraqitura dhe analiza e bërë me prokurorin e çështjes, u zhvillua operacioni dhe u arrestuan në flagrancë efektivi i Policisë dhe 3 persona të tjerë, që dyshohet se bashkëpunonin me të.

ARRESTIMET

SHÇBA bëri arrestimin në flagrancë të Ledion Bakos, 27 vjeç, nga Tirana, me detyrë ndihmësspecialist për Hetimin e Krimeve në Komisariatin e Policisë Nr.2 Tiranë, për veprat penale të “Prodhimi dhe shitja e narkotikëve”, “Ushtrim i ndikimit të paligjshëm ndaj personave që ushtrojnë funksione publike” dhe “Mbajtje pa leje e armëve dhe municioneve”.

Gjithashtu u arrestuan edhe shtetasit: J.K., 26 vjeç, nga Tirana, financier, për veprën penale të “Prodhimi dhe shitja e narkotikëve” dhe “Mbajtje pa leje e armëve dhe municioneve”; E. M., 35 vjeç, nga Tirana, për veprën penale të “Prodhimi dhe shitja e narkotikëve” dhe “Mbajtje pa leje e armëve dhe municioneve”; A. K., 31 vjeç, nga Tirana, për veprën penale të “Prodhimi dhe shitja e narkotikëve” dhe “Mbajtje pa leje e armëve dhe municioneve”.

Gjatë operacionit u sekuestruan në cilësinë e provës materiale një pistoletë me fishekë, disa telefona celularë, dy qese plastike, në të cilat dyshohet se kanë mbetje të lëndës narkotike kokainë, si dhe kopje kartëmonedhash të huaja. Ministria e Brendshme tha se hetimet po vijojnë edhe ndaj personave të tjerë, të cilët dyshohet se janë furnizues me lëndë narkotike të personave të arrestuar.