Aksident tronditës në aksin Lezhë-Laç, 4 të plagosur

Një aksident i rëndë është regjistruar mesditën e kësaj të diele në segmentin rrugor Lezhë–Laç, ku dy automjete janë përplasur me njëra-tjetrën në rrethana ende të paqarta.

Si pasojë e përplasjes së fortë, katër persona kanë mbetur të lënduar, ndërsa dy prej tyre raportohet se ndodhen në gjendje të rëndë shëndetësore.

Menjëherë pas ngjarjes, në vendngjarje kanë mbërritur shërbimet e Policisë Rrugore dhe ekipet e urgjencës, të cilat kanë transportuar të plagosurit drejt spitalit për trajtim mjekësor.

Sipas verifikimeve paraprake të policisë, drejtuesit e mjeteve të përfshira në aksident nuk kanë qenë nën efektin e alkoolit në momentin e përplasjes.

Ndërkohë, grupi hetimor vijon punën për të sqaruar shkaqet dhe rrethanat që çuan në këtë aksident.