Aksidenti tragjik në Manzë, 4 viktima, humb jetën edhe 16-vjeçari

Bilanci i aksidentit të rëndë automobilistik të ndodhur pak ditë më parë në rrugën dytësore të Manzës është rënduar edhe më tej. Ka shkuar në katër numri i personave që kanë humbur jetën, pas ndarjes nga jeta në spital të 16-vjeçarit Klevis Dervishi.

I mituri kishte mbetur i plagosur rëndë në përplasjen e fuqishme dhe, pavarësisht trajtimit mjekësor dhe përpjekjeve të mjekëve për t’i shpëtuar jetën, nuk ka mundur t’u mbijetojë dëmtimeve të marra. Pas disa ditësh në spital, 16-vjeçari ka ndërruar jetë, duke e çuar në katër bilancin e viktimave të aksidentit.

Në këtë ngjarje të rëndë kanë humbur më herët jetën edhe 25-vjeçari Kleo Vrioni, bashkëshortja e tij Sara Brugnatelli dhe 15-vjeçari Alvi Muhaxhiri.

Aksidenti shkaktoi tronditje të fortë në zonë, ndërsa pasojat e përplasjes rezultuan fatale për katër persona.

Ndërkohë, autoritetet vijojnë hetimet për të përcaktuar rrethanat e sakta të aksidentit, mënyrën se si ka ndodhur përplasja dhe shkaqet që çuan në këtë tragjedi.