Aktori flet për herë të parë publikisht: Ajo ishte shoqja ime, ishte një ngjarje e tmerrshme!

Aktori amerikan Alec Baldwin ka folur për herë të parë publikisht që prej ngjarjes së rëndë, ku ai vrau aksidentalisht gjatë xhirimeve kineasten Halyna Hutchins.

Duke folur për gazetarët aktori tha se në të ardhmen do të jetë në favor të kufizimit të përdorimit të armëve të zjarrit në prodhimet filmike për të mbrojtur sigurinë e njerëzve.

Po ashtu Baldwin u shpreh se policia e kishte urdhëruar që të mos komentonte mbi procesin hetimor. Prokurorët thonë se nuk e kanë përjashtuar mundësinë e ngritjes së kallëzimeve penale për rastin.

42-vjeçarja Hutchins u qëllua në xhirimet e filmit western “Rust” në shtetin amerikan të New Mexico-s, kur Baldwin shkrepi një armë pa e ditur që ishte e mbushur. Regjisori i filmit, Joel Souza, po ashtu mori një plagë në shpatull gjatë ngjarjes së rëndë.

“Ajo ishte shoqja ime. Ditën që mbërrita në Santa Fe dhe nisëm xhirimet, e mora në darkë me Joelin,” u tha Baldwin fotografëve që e kishin ndjekur atë dhe familjen e tij në shtetin e Vermontit.

“Ne ishim një ekip shumë i mirë dhe më pas ndodhi kjo ngjarje e tmerrshme”, tha ai. Alec Baldwin theksoi se ishte një prej atyre incidenteve “një në një trilion”, duke shtuar se aksidente të kësaj natyre ndodhin shumë rrallë.

“Një përpjekje e vazhdueshme për të kufizuar përdorimin e armëve të zjarrit në grupe xhirimi filmash është diçka për të cilën jam jashtëzakonisht i interesuar”, shtoi ai.