Albin Kurti vetëizolohet në banesë, pati kontakt me një të prekur me koronavirus

Një zyrtar i Ministrisë së Integrimeve Evropiane (MIE), kishte pasur kontakt të ngushtë me një person që ka rezultuar pozitiv me COVID-19, por ky zyratr është takuar edhe me Kurtin, ndaj kryeministri është vetëizoluar.

Lajmin e ka bërë të ditur vetë Kurti në rrjetet sociale, ndërsa thotë se po pret rezultatin e analizës.

Postimi i Albin Kurtit:

Të dashur qytetarë,

Sot është dita e parë kur nuk do të dal në punë në Kryeministri (ZKM). Një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalur pozitiv në testin për COVID-19. Janë marrë mostrat dhe po presim rezultatin.

Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE.

Do t’i kryejmë detyrat nga largësia me përkushtimin e njëjtë, do t’i marrim vendimet e duhura me përgjegjësinë e njëjtë.

Ju faleminderit.