Alibeaj flet për dosjen “Babale”: Përgëzoj qëndrimin e Salianjit

Enkelejd Alibeaj foli në lidhje me dënimin e deputetit Ervin Salianji për një dosje, për të cilën kur u denoncua ishte në krah të tij, por jo kur gjykata mori vendimin që ta burgosë.

Deputeti demokrat deklaroi se i vjen keq për dënimin e Salianjit, teksa e përgëzoi këtë të fundit që u përball me shpatullat e tij me drejtësinë.

Ai shtoi se politikanët duhet të jenë koherentë për sa i përket drejtësisë. Alibeaj refuzoi të komentojë nëse vendimi i gjykatës sa i takon çështjes “Salianji” ishte i drejtë apo i gabuar.

Alibeaj bëri “prapaktheu” duke shprehur pendesë që në të shkuarën ka qenë pjesë e grupit të deputetëve që shkonin në sallën e gjyqit kur përballej deputeti Ervin Salianji.

“Është e rëndë që një individi i kufizohet liria. Në situatën ku jam si politikan, si deputet, duhet të marr njëfarë kohe për t’u zhveshur nga emocionet.

Kisha një lloj keqardhje. Keqardhjen më të madhe e kam për familjarët e Salianjit. Janë ata të parët që ndiejnë…Përgëzoj qëndrimin e Salianjit që mbajti kur shkoi të përballet me dënimin.

Një politikan kur ka një hesap me drejtësinë mban një qëndrim dhe e mban me shpatullat e veta. Dy muaj më parë 2 nga 3 gjyqtarët gjykuan dhe çështjen e vulës.

E gëlltita padrejtësinë e bërë nga ata gjyqtarë, sepse besoj se në politikë duhet të jesh koherent. Në raport me sistemin e drejtësisë nuk duhet të reagonin edhe në këtë çështje”, tha Alibeaj në “Off the Record” në “A2CNN”.