Ambasada amerikane apel qytetarëve të saj: Duhet të jeni vigjilentë

Ambasada amerikane ka nxjerrë apel për qytetarët amerikanë që jetojnë në Shqipëri të shmangin zonat ku do mbahet manifestimi i thirrur nga Presidenti Ilir Meta më 2 mars. Në njoftim kujtohet se në demonstratat e mëparshme ka pasur dhunë, ndaj u kërkohet qytetarëve amerikanë të jenë vigjilentë dhe të shmangin zonat ku do të mbahet tubimi.

“Një tubim politik pritet të zhvillohet në 2 Mars 2020 duke filluar rreth orës 5:00 pasdite.

Kohëzgjatja e tubimit të pritshëm është e panjohur. Në demonstratat e kaluara ka pasur dhunë. Forcat e sigurisë kanë përdorur topa uji dhe gaz lotsjellës për të shpërndarë turmat. Personeli i Ambasadës amerikane dhe anëtarët e familjes së tyre janë orientuar për të shmangur zonën ku do mblidhen demonstruesit.” thuhet në njoftimin e Ambasadës Amerikane, teksa u këshillon të “shmangni vendet e mundshme të protestës përfshirë Bulevardin Kombëtar. Monitoroni median lokale për përditësime.”