AMP arreston policin e “Shqiponjave”

Një oficer policie përfundoi në pranga, pasi u përfshi në një aksident me dëme materiale dhe kundërshtoi kolegët e tij duke mos bërë testin e alkoolit.

Agjencia e Mbikëqyrjes Policore (Rajoni Durrës – Kavajë) njoftoi arrestimin e punonjësit tw policisë Inspektor A. B., me detyrë Trupë Shërbimi i Forcës së Posaçme “Shqiponja” pranë DVP Durrës. Ai dyshohet se për veprat penale “Drejtim i automjetit në mënyrë të parregullt” dhe “ Mosbindja ndaj urdhërit të punonjësit të policisë së rendit publik”.

Nga hetimet rezulton se mëngjesin e sotëm rreth orës 05:40, duke drejtuar automjetin tip “Audi” në rrugën “Egnatia”, ai ka humbur kontrollin dhe si pasojë ka përplasur disa automjete të parkuara duke shkaktuar dëme materiale.

Në zbatim të procedurës standarte i është kërkuar të bëjë testin e alkoolit, por punonjësi ka refuzuar. Në këto kushte i është marrë monstër gjaku në ambientet e Spitalit Rajonal Durrës.

Lidhur me rastet materialet i janë dorëzuar prokurorisë për hetime të mëtejshme.