Apeli i GJKKO dënon Fran Frrokajn me 2 vite e 8 muaj burg

Vendimi i Gjykatës së Posaçme të Apelit për çështjen Frrokaj dhe Cara Gjykata e Posaçme e Apelit për Korrupsionin dhe Krimin e Organizuar ka dhënë vendimin përfundimtar në lidhje me çështjen ndaj Fran Frrokaj, ish-kryebashkiak i Lezhës, dhe Bledar Carës.

Pas shqyrtimit të ankimimeve, gjykata ka vendosur: 1. Fran Frrokaj u deklarua fajtor për kryerjen e veprës penale “Shpërdorimi i detyrës”, sipas nenit 248 të Kodit Penal, dhe u dënua me 4 vjet burgim. Pas llogaritjes së uljes së dënimit, ai do të vuajë 2 vjet e 8 muaj burgim. 2. Bledar Cara gjithashtu u deklarua fajtor për “Shpërdorimin e detyrës” dhe u dënua me 2 vjet burgim. Pas shqyrtimit të ankimimit, dënimi përfundimtar është 1 vit e 4 muaj burgim. Po ashtu, iu dha një dënim plotësues, heqja e të drejtës për të ushtruar funksione publike për një periudhë 5-vjeçare. 3. J.M., e pandehur për të njëjtën vepër penale, u dënua me 2 vjet burgim, ndërsa dënimi përfundimtar është 1 vit e 4 muaj burgim. Për të, ekzekutimi i dënimit u pezullua dhe u caktua vënia në provë për 5 vjet, me kusht që gjatë këtij periudhe të mos kryejë vepra të tjera penale. Po ashtu, për të u caktua heqja e së drejtës për të ushtruar funksione publike për 5 vjet. Në përfundim, Gjykata e Posaçme e Apelit refuzoi ankimimin e shoqërisë *** sh.p.k. kundër vendimit të Gjykatës së Posaçme të Shkallës së Parë për Korrupsionin dhe Krimin e Organizuar. Ky vendim është përfundimtar dhe nuk mund të ankimohet më.