Arrestimi në lokalin e tij i Rexhep Rapit, 58-vjeçari lëvizte me makinë të blinduar

Policia e Durrësit ka dhënë detaje për arrestimin e shtetasit Rexhep Rapi, i cili njihet ndryshe edhe me nofkën ‘Kep Rapi’, dhe që rezulton me precedent të mëparshëm kriminal kundër jetës së personit dhe në fushën e narkotikëve.

Mësohet se forcat e policisë kanë ushtruar kontroll në lokalin në pronësi të tij në autostradën Durrës-Tiranë, pas informacioneve që kishin marrë se ai mbante armë pa leje me vete.

Mësohet se poshtë banakut, në një çantë dore është gjetur një armë zjarri pistoletë e cila nga veprimet hetimore rezultoi se i përkiste shtetasit Rexhep Rapi.

Ky i fundit lëvizte edhe me makinë të blinduar, e cila është sekuestruar nga policia.

Rexhep Rapi, në mars të vitit 1991, u akuzua se ka vrarë në Portin e Durrësit, për gjakmarrje, shtetasin A. Çyrbja, banor i fshatit Katund Sukth.

Rapi u arrestua për këtë krim në 1994 dhe u lirua për mungesë provash.

Njoftimi nga Policia e Durrësit

Kontrolle të shtuara për evidentimin dhe goditjen e veprimtarisë kriminale në fushën e armëmbajtjes pa leje.

Operacioni i zhvilluar nga Forca e Posaçme Operacionle e DVP Durrës më bashkëpunim me Komisariatet e Policisë Durrës dhe Shijak.

Arrestohet në flagrancë 1 shtetas me precedent të mëparshëm kriminal kundër jetës së personit dhe në fushën e narkotikëve.

Procedohet penalisht një tjetër shtetas për veprën penale “Moskallëzim krimi”.

Sekuestrohet një armë zjarri pistoletë dhe mjeti i blinduar me të cilën ky shtetas lëvizte.

Në zbatim të Planit të Masave të hartuar nga Drejtoria e Përgjithshme e Policisë “Për kontrollin e territorit, parandalimin e ngjarjeve kriminale kapjen e autorëve që mbajnë armë zjarri pa leje”, në bazë të informacioneve të mara në rrugë operative se një shtetas dispononte armë zjarri me vete, menjëherë Forcat e Posaçme Operacionale në DVP Durrës kanë mirëorganizuar punën dhe kanë bërë arrestimin në flagrancë të shtetasit:

Rexhep Rapi., 58 vjeç, banues në Sukth, Durrës.

Shërbimet e Policisë në bazë të informacioneve të mara se në ambinetet e një lokali në autostradën Durrës-Tiranë, ndodhej një shtetas i cili dispononte armë zjarri me vete, kanë ushtruar kontrolle dhe në banakun e lokalit kanë gjetur një çantë dore ku u gjet një armë zjarri pistoletë e cila nga veprimet hetimore rezultoi se i përkiste shtetasit Rexhep Rapi.

Në vijim të veprimeve u procedua penalisht për veprën penale “Moskallëzim krimi”, shtetasi G. M., (punonjës i subjektit), i cili kishte dijeni për armën e zjarrit dhe nuk ka treguar.

Në cilësinë e provës materiale u sekuestruan 1 armë zjarri pistoletë dhe mjeti tip “Benz”, i blinduar me të cilën ky shtetas lëvizte.

Materialet i kaluan Prokurorisë së Rrethit Gjyqësor Durrës për veprën penale “Armëmbajtja pa leje”.