I riu belg ra nga Jet Ski dhe ndodhet në gjendje të rëndë për jetën!

Një ditë më parë një turist belg ra nga Jet Ski në Durrës dhe ndodhet në gjendje të rëndë për jetën.

Një 51-vjeçar shqiptar u arrestua sot, pasi i dha me qira mjetin lundrues pa masat e sigurisë dhe pa lejen e duhur për drejtimin e tij. Policia njofton se i arrestuari, gjatë hetimeve, ka penguar zbardhjen e së vërtetës me informacionet e rreme që ka dhënë. Turisti ndodhet në spital nën kujdesin e mjekëve, ndërsa materiali procedurial është dërguar në prokurori për veprime të mëtejshme.

Njoftimi i policisë:

Durrës

Specialistët për Hetimin e Krimeve të Stacionit të Policisë Plazh arrestuan në flagrancë shtetasin S. Xh., 51 vjeç, banues në Tiranë, për veprat penale “Shkelja e rregullave të mbrojtjes në punë” dhe “Veprime që pengojnë zbulimin e së vërtetës”.

Nga veprimet hetimore të kryera në drejtimin e Prokurorisë, për ngjarjen e ndodhur ditën e djeshme, në zonën e quajtur “Shkëmbi i Kavajës”, rezultoi se shtetasi S. Xh. i ka dhënë me qira një mjet lundrues Jet Ski, pa masat e sigurisë të nevojshme, shtetasit belg H. K., i cili nuk është i pajisur me leje drejtimi për këtë kategori mjetesh. Gjithashtu, shtetasi S. Xh., gjatë kryerjes së veprimeve procedurale, ka dhënë informacione të rreme për rastin.

Shtetasi H. K., që u dëmtua gjatë manovrave me mjetin lundrues, vijon të jetë në spital, në kujdesin e mjekëve.