Arrestohet pas muajsh në arrati ish-bashkëshorti i Xhuana Nikollajt

Pas disa muajsh në kërkim, është arrestuar Eraldo Fizi, ish-bashkëshorti i Xhuana Nikollajt, 25-vjeçares nga Lezha e cila humbi jetën disa muaj më parë në rrethana tragjike.

Fizi ishte shpallur në kërkim nga autoritetet që prej muajit mars, ndërsa arrestimi i tij është bërë i mundur pas bashkëpunimit mes strukturave të Policisë në Tiranë dhe Lezhë.

Sipas informacioneve të bëra publike, ndaj tij rëndon dyshimi se ka ushtruar dhunë ndaj ish-partneres së tij. Pas ngjarjes, Nikollaj kishte konsumuar medikamente dhe më pas kishte ndërruar jetë në spital.

Për arrestimin e Fizi-t është bashkëpunuar edhe me familjarët dhe avokatin e tij, duke mundësuar dorëzimin e tij te autoritetet.

Aktualisht, Eraldo Fizi ndodhet në Lezhë, ndërsa pritet që të transferohet në Tiranë, ku do të vijojnë procedurat e mëtejshme ligjore.

Hetimet pritet të sqarojnë rrethanat e plota të ngjarjes dhe përgjegjësinë e personave të përfshirë.