As otomanët nuk e katandisen Shqipërinë në këtë derexhe!

Pasi desh dogji të gjallë njerëz brenda një pallati jashtë standardeve, me një leje ndërtimi dhe kolaudimi të PS-së; me zjarrfikëse që nuk futen dot në një rrugë të ngushtuar nga PS-ja, të lëna pa mjete profesionale dhe pa ujë; pasi shkon në spital dhe nuk gjen ilaçe prej PS-së; pasi detyrohesh të bësh mësime private për fëmijën, se arsimi ka marrë fund prej PS-së; pasi detyrohesh të mbash edhe prindërit në pension prej PS-së; pasi paguan naftën sikur të jetë verë franceze prej PS-së; pasi shikon dalëngadalë të gjithë shoqërinë dhe familjen të emigrojë jashtë prej PS-së; i stresuar, i mërzitur, i shkatërruar nga nervat, aty në makinë, i bllokuar mes trafikut prej PS-së, të bie të dëgjosh edhe moralin nga PS-ja: “Pse e shani vendin”.

Duan edhe të të bëjnë për budalla. Pika më e ulët në historinë e qeverisjes së Shqipërisë.

As osmanët nuk i kanë bërë Shqipërisë këtë. Vërtet nuk kishte shëndetësi, arsim apo rrugë, por nuk të merrnin as taksa; të linin në hesapin tënd; nuk të vidhnin pronën, se tapia ishte e shenjtë dhe, në fund të fundit, as të bënin moral pse ankoheshe tek të huajt për gjendjen katastrofike të Shqipërisë osmane. E dinin edhe vetë që e kishin bërë baltë.

Jemi në pikën më të ulët të historisë së qeverisjes në Shqipëri.