Avioni ambulancë rrëzohet dhe shpërthen në flakë, asnjë i mbijetuar në SHBA

Një avion transporti mjekësor është përplasur në një lagje të Filadelfias të premten në mbrëmje, pak pas ngritjes, duke shpërthyer në një top zjarri që përfshiu disa shtëpi. Në bord ishin një pacient fëmijë, nëna e saj dhe katër anëtarë të ekuipazhit.

Të gjithë pasagjerët dhe ekuipazhi në avion ishin nga Meksika. Fëmija ishte trajtuar në Filadelfia për një gjendje të rëndë mjekësore dhe po transportohej për në shtëpi. Destinacioni përfundimtar i fluturimit do të ishte Tijuana, pas një ndalese në Misuri. Zëdhënësi i Jet Rescue, Shai Gold, theksoi se ekuipazhi ishte i trajnuar dhe me përvojë. Avioni ishte regjistruar në Meksikë dhe kompania ka operacione si në SHBA ashtu edhe në Meksikë.

Ky incident erdhi vetëm dy ditë pas një përplasje tjetër tragjike, ku një avion i American Airlines dhe një helikopter ushtarak u përplasën në Uashington, D.C., duke shkaktuar viktima të shumta. Përplasja në Filadelfia ishte incidenti i dytë fatal për Jet Rescue në 15 muaj, pas një tragjedie të ngjashme në vitin 2023 në Meksikë, ku pesë anëtarë të ekuipazhit humbën jetën.