Babë e bir u arrestuan pasi mashtronin biznesmenët, zbardhet skema që përdorte grupi. U shkruanin sipërmarrësve dhe shtireshin si zyrtarë, ja çfarë premtonin

Ditën e djeshme policia ka njoftuar arrestimin e dy personave, babë e bir në Tiranë, të cilët tentuan të mashtronin një biznesmen me qëllim që t’i merrnin shumën prej 100 mijë eurosh. Gazetari ynë ka zbardhur skemën që dy të arrestuarit përdornin me qëllim mashtrimin.

Mësohet se ata i shkruanin biznesmenëve në platformën “Telegram” duke u shtirur se ishin të afërm të një politikani. Fillimisht skema e mashtrimit niste në “Telegram”, ku organizator ishte shtetasi Florian Gjergji, i cili i shkruante biznesmenëve duke i thënë “jam i afërm i x politikani” dhe më pas pretendonte se ishte zyrtar i lartë në shtet dhe në këmbim të parave u premtonte favore apo ndikim në shtet në lidhje me bizneset. Ndërkohë ky shtetas nuk dilte vetë në terren për të marrë shumën e të hollave për të cilat ishte dakorduar me “viktimën”, por një detyrë të tillë e kryenin Bedri dhe Albert Vodha.

Ky ishte momenti ku policia vendosi grupin nën përgjim, deri në ,momentin kur grupi u riaktivizua dhe tentoi të mashtronte viktimën e radhës. Kujtojmë se organizatori i grupit, është ende i shpallur në kërkim dhe se po punohet për kapjen e tij.