‘Bandat kriminale po kontrollojnë vendin’, Lleshaj përballet me gazetarin Hoxha: S’është e vërtetë!
Ministri i Brendshëm Sandër Lleshaj ka folur për situatën aktuale në vend, referuar krimit të organizuar, vrasjeve apo veprave penale të tjera si aksidentet apo kultivim lëndësh narkotike.
Lleshaj tha se 2020 ka qenë viti më i mirë, me statistikat më të mira në 30 vite.
Nga ana tjetër Artan Hoxha i tha Lleshajt se krimi i organizuar kontrollon shumicën e qyteteve shqiptare, jo si në 1997, por në mënyrë më të sofistikuar, më të modernizuar, duke kontrolluar shoqërinë, bizneset.
Lleshaj: Nuk ka vrasje të njëpasnjëshme për ditë. Ato jashtë vendit nuk llogariten, janë jashtë juridiksionit tonë. Fenomeni nuk është në nivele shqetësuese, vetëm 49 vrasje për këtë vit. Në vlerat më të mira historike. Vrasje me 2019 kemi 13% më pak. Vrasje në familje 57% më pak se në 2019. Aksidente 15% më pak, viktima nga këto aksidente 18% më pak se në 2019. Nuk jemi në dramë. Edhe njëri po të vritet është problem.
Fevziu: Në Vlorë ka persona që janë zhdukur dhe s’po gjenden ende.
Lleshaj: Është bërë legjendë Vlora. Nuk rezulton të jetë numër i lartë.
Hoxha: Në shtator 2018 kemi publikuar videon e rrëmbimit të Elvis Troqes dhe u ndaluan rrëmbimet. Për 3 muaj më pas u zhdukën 3 persona. Për rastin e fundit të Ermal Ngucaj, që nuk është gjendur më, është fenomen kriminal i dukshëm. Ose prokurori bën dosje të tjera dhe ju hetoni persona të tjerë…
Prokuroria ende edhe sot e kësaj dite nuk ka dhënë urdhër arresti për persona të implikuar në krime. Janë përmendur nga OFL kur filloi operacioni. Ata pranuan që kanë qenë në vrasje dhe jo vetëm. Për të tjerët s’ka urdhër arreste.
Lleshaj: Te Vlora, për të zhdukurit, cilësohet i zhdukur një person për të cilin ka denoncim në polici. Marrëdhëniet tona me prokurorinë e përgjithshme janë shumë të mira, por nëpër rrethe varion.
Hoxha: Ju thatë se në asnjë cep të Shqipërisë nuk ka kontrolle nga krimi. Por s’do të thotë se jemi në 1997, por në mënyrë më të sofistikuar. Kapin jetën shoqërore, bizneset. Policia në vitet e fundit në Elbasan ka zbuluar një nga një disa ngjarje, por problemi është ky, që nëse nuk ka bashkëpunim nuk ka sukses. Grupet kriminale po i ndërpresin financat njeri-tjetrit. Me ato para blihen mercenarët, armët, rekrutohen të varfër që me 5 lekë të vrasin.
Gazetari Hoxha i nxjerr faktet, në 3 kapje në Itali, Greqi dhe Mal të Zi, mbi 3 ton kanabis të kapur nga fqinjët.
Hoxha: Beteja me kanabisin nuk është policore, por politike.
Lleshaj: Shumë shqiptarë kanë emigruar dhe merren me kultivim kanabisi. Unë mbaj përgjegjësinë time.
Gazetarja e kronikës Klodiana Lala ka “vënë në siklet” ministrin e Brendshëm Sandër Lleshaj, duke i kërkuar një emër “peshku të madh” apo një emër operacioni të madh anti-krim që ka bërë bujë.
Sipas gazetarëve në panelin e “opinion”, krimi i organizuar është rritur dhe nuk ka grupe kriminale të shkatërruara apo peshq të mëdhenj të arrestuar.
Lleshaj tha se nuk dëshiron të japë emra dhe me ironi deklaroi se nuk merret me peshq. Më herët Lleshaj ka thënë se posti i tij është politik dhe nuk merret me arrestime konkrete.
Medini: Në 2018-2019 ne kemi 0 grupe kriminaleqë merren me kultivim kanabisi të vënë përballë drejtësisë.
Lleshaj: Kryesisht grupet kriminale janë të ngritura nga kultivimi i drogës. Raporti i fundit i KE flet për shumë grupe krimi të shkatërruara në Shqipëri.
Lala: Na thoni ndonjë emër të ndonjë peshku të madh. Cilët janë këta peshq të mëdhenj? Unë rri gjithë ditën te dera e gjykatës dhe aty s’më rezulton ndonjë emër i madh. Më thuaj një emër operacioni dhe unë do t’ju kërkoj falje.
(Lleshaj nënqesh…)
Lleshaj: Unë nuk jap emra sepse jam ministër i Brendshëm. Nëse keni kureshtje do t’ju sjell një oficer të policisë kriminale dhe tua thotë.
Lala: 2019-2020 vetëm kriminelë kanë dalë nga burgu. Na përmend një operacion i suksesshëm.
Lleshaj: Ka me dhjetëra.
Lala: Po më thuaj një nëse ju ka mbetur në mendje.
Lleshaj: Unë nuk jap emra as peshq të mëdhenj, nuk merrem me peshq.
Keni një histori? Denonco anonimisht, identiteti juaj mbrohet.
Denonco
